شاہراہ غازی ملت پر ناقص کام بند نہ کیا گیا، شیخ زید ہسپتال تا ہائوسنگ سکیم بائی پاس سڑک پر کام شروع نہ ہوا، ایسٹرن بائی پاس اور ویسٹرن بائی پاس کے معاوضہ جات دے کر کام شروع نہ کروایا گیا تو 12ستمبر کو مکمل شٹر ڈائون کیا جائے گا۔ صدر آزاد کشمیر کا راولاکوٹ آمد پر بھرپور استقبال کیا جائے گا۔ صدر آزاد کشمیر ضلع پونچھ کے منصوبہ جات پر کام شروع کروانے کیلئے اپنا کلیدی کردار ادا کریں تاکہ ضلع پونچھ کا احساس محرومی ختم ہوسکے۔ ان خیالات کا اظہار انجمن تاجران راولاکوٹ کے صدر سردار افتخار فیروز، جنرل سیکرٹری آصف نسیم، سینئر نائب صدر حاجی اعجاز حنیف، ذوالفقار خان اور طاہر فاروق نے پریس کانفرنس سے خطاب کرتے ہوئے کیا۔ اس موقع پر تاجروں کی ایک بڑی تعداد بھی موجود تھی۔ صدر افتخار فیروز نے کہا کہ اربوں روپے لگانے کے بعد بھی شاہراہ غازی ملت کا کام مکمل نہیں ہورہا اور جو کام ہورہا ہے وہ بھی انتہائی ناقص ہے۔ اس کے ذمہ دار ایکسین ایپ اور متعلقہ کنسلٹنٹ ہیں جنہوں نے کروڑوں روپے کمیشن کھاکر ضلع پونچھ کی روح کہلانے والی سڑک کو تباہ کردیا ہے۔ انہوں نے کہا کہ راولاکوٹ شہر سے ٹرانسپورٹ کو کم کرنے کیلئے انتہائی اہم منصوبہ شیخ زید ہسپتال تا ہائوسنگ سکیم سڑک تھا لیکن اس سڑک کو ضلعی انتظامیہ نے سرخ فیتے کی نذر کردیا ہے۔ اگر 12 ستمبر تک ان سڑکوں پر کام شروع نہ ہوا تو اس کے ذمہ دار یہ جان لیں کہ ہم کسی کو سکون سے نہیں بیٹھنے دیں گے۔ کنگ عبداللہ یونیورسٹی کا ٹینڈر ہوئے چھ ماہ ہوچکے ہیں لیکن اس پر بھی کام شروع نہیں ہوا۔ ٹائیں ڈھلکوٹ سڑک کی کمپنی آٹھ کروڑ روپے لے کر فرار ہوچکی ہے۔ راولاکوٹ سٹیڈیم کا کام ایک عرصے سے ٹھپ ہے۔ سٹی ڈویلپمنٹ پر کام کرنے والی چائینیز کمپنیاں انتہائی ناقص کام کررہی ہیں لیکن کسی کے کان پر جوں تک نہیں رینگ رہی۔ شیخ زید ہسپتال کو تعمیر ہوئے دو سال ہوچکے ہیں لیکن اس کا مین گیٹ آج تک نہیں کھیلا گیا جس سے عوام کو شدید مشکلات کا سامنا کرنا پڑتا ہے۔ سیاستدان اپنی ذمہ داریوں سے واقفیت ہی نہیں رکھتے اسلئے عوام کو شعور دینے اور ان کے مسائل کو حل کرنے کیلئے انجمن تاجران نے یہ بیڑا اٹھایا ہے۔ اسلئے عوام، سول سوسائٹی، وکلائ، ٹرانسپورٹر، طلباء تنظیمیں اور دیگر سیاسی و سماجی تنظیمیں ہمارا ساتھ دیں تاکہ ان مسائل کو حل کیا جاسکے
